شبكة همس الشوق
صفحة 1 من 2 1 2
عرض 40 مشاركات من هذا الموضوع لكل صفحة

شبكة همس الشوق (https://www.hamsalshok.com/vb/index.php)
-   همس دواوين الشعراء (https://www.hamsalshok.com/vb/f332)
-   -   ديوان ونبذه عن الشاعر فهد المساعد (https://www.hamsalshok.com/vb/t103744.html)

حنين الأشواق 25 - 4 - 2022 06:33 PM
ديوان ونبذه عن الشاعر فهد المساعد
 










ديوان ونبذه عن الشاعر فهد المساعد


- ولد الشاعر في الرياض وعاش فيها ما يقارب أربع سنوات من طفولته قبل أن ينتقل إلى مركز الرمحية التابع لمحافظة رماح في منطقة الرياض،
- في الرمحية درس مراحل التعليم العام
- ثم انتقل بعدها للعيش في مدينة الرياض
- بدأ نشر إنتاجه الشعري عام 1999م في مجلة (فروسية وشعر)، ثم استمر في النشر في عدد من المجلات الشعرية المعروفة أبرزها: مجلة (فواصل). 
- وتميّز في السنوات الأخيرة بقصائده الغنائية التي حققت نجاحات كبيرة مع العديد من المطربين من أبرزها قصيدة (لو يوم أحد) التي غنّاها الفنان عبد المجيد عبد الله.
- كانت للمساعد تجربة قصيرة في العمل الصحفي من خلال إشرافه على ملف الشعر في مجلة (فواصل) عام 2008.
- كُلّف بكتابة أوبريت مهرجان الجنادرية 
- دواوين مطبوعة:
(سالفة عشاق). صدر عام 1428هـ - 2007م.
(وشم) يوميات الشاعر فهد المساعد. صدر عام 1430هـ.
(عمري الجاي). صدر عام 1432هـ.
(ما علّمك صوت المطر؟!). صدر عام 2014م.
- دواوين صوتية
ألبوم (المدينة والغريب).
ألبوم (الأسرار).
ألبوم (الذكريات)

حنين الأشواق 25 - 4 - 2022 06:34 PM
رد: ديوان ونبذه عن الشاعر فهد المساعد
 










سالفة عشاق


من بغى الفرقا لقى له عذر واسباب ودليل

خل عنك العذر والاسباب دام الحب ضاع

كان ودك بالفراق .. ابشر عسى عمرك طويل

لاتردد وانت لك كلمه ولك امر ٍ مطاع

لي عليك انّك تبّت بكلمة ٍ تشفي الغليل

ولك عليّ اني لأوّقف وقفة الرجل الشجاع

لاتجاملني مخافة قال مدري خوف قيل

عمر هرج الناس مايسمن ولايغني جياع

كان قصدك سر حبك .. اوعدك لأصبح بخيل

واحمل اسرارك معي للموووت قدر المستطاع

بس قلها ... قل ما احبك ... وابشر بصبر ٍ جميل

لاتحسب أني مثل من طبعهم لوي الذراع!

صاحبك ماهو كذا ياصاحب القد النحيل

صاحبك طبعه غريب وغربته غربه طباع

في الهوى مايقبل الحل الوسط ولا القليل

مثل ماهو لاشرى يشري .. ليامن باع باع

ثابت ٍ لو هي تميل الارض حدره ... مايميل

يدري ان الفقر ماهو عيب والدنيا متاع

ماعشق لذّة حياته كثر عشق المستحيل

ولا كره حتى مماته كثر كره الأنصياع

كم تعلّم من شديد البدو وش معنى الرحيل

وكم تعلّم من غروب الشمس وش معنى الوداع

وكم تعلّم من سحاب الصيف وش معنى الحصيل

وكم تعلّم من ليال البرد وش معنى الضياع

ايه انا هذا طريقي موحش .. وصعب .. وطويل

وانت لامنك تعبت .. العالم فجوجه وساع

اعتبرني في بداية سكّتك عابر سبيل

و رح وانا قلبي معك من وين وجّهت الشراع

يكفي اني لاانذكرت في سالفة عشّاق .. قيل:

عاشر احبابه شجاع .. وفارق احبابه شجاع

حنين الأشواق 25 - 4 - 2022 06:35 PM
رد: ديوان ونبذه عن الشاعر فهد المساعد
 










نديم الجرح


يانديم الجرح واللي وصتّك بأرقامها

عارف انّك ما تعرف الا شذى يشمومها

لا تعلمني عن آخر ما حصل فأيامها

من رسالتها عرفت اليوم كل علومها

أدري إن الوقت شمّر عن يديه وضامها

وأدري إن الحظ الأقشر صار مثل هدومها

وأدري إن الهم وقّف في طريق أحلامها

لين صار الحزن أثرها .. والشقى مقسومها

بس تستاهل .. هي اللي طاوعت من لامها

وباعت اللي كل ذنبه .. مادخل في سومها

خلها تدفع ثمن غلطاتها ما دامها

همّّلت قلبي .. وراحت .. وأسرفت في حومها

يبتعد مع كل خطوه .. صوت وقع أقدامها

وتقرب الضيقه .. وتصحى دمعتي من نومها

لين غابت عن عيوني .. وأنجلى هندامها

ليلةٍ .. تغفى على صدر الظلام نجومها

كنت احس بشيّ .. والله ماتشيل عظامها

لو تحس بشييّ منه .. يمر وسط حلومها

كنت احس إن الضلوع العوج مثل أيتامها

وأشعر إن القلب نبضه منتهي من يومها

والحياه اللي تدور شهورها وأعوامها

وقّفت .. واليوم دور رماحها وسهومها

ياكثر ما اغرقت نفسي في بحور اوهامها

وياكثر ماضعت بين أوهامها وهمومها

ما جداي إلا احلم اني واقفٍ قدامها

وأتخيلها تعاتبني .. وأروح ألومها

يانديم الجرح .. خلّك من علوم أيامها

مابقى في القلب رغبه يلتفت لعلومها

والرساله ردّها للي زمنها ضامها

وقلها كلمه .. وتفهمها حسب مفهومها

والله أن أقص كفي قبل .. أدق ارقامها

والله أن اشيل قلبي .. قبل أشيل همومها

حنين الأشواق 25 - 4 - 2022 06:35 PM
رد: ديوان ونبذه عن الشاعر فهد المساعد
 










كبوة جواد


صعب لامنّك فشلت .. وصعب لامنك لقيت

إن من يكره نجاحك .. يدري إنك مانجحت

أمس ضقت .. ورحت أقلّب ذكرياتي .. وأنتهيت

عند صورة طفل صوته مثل صوتي لاانجرحت

وش مثل لا والله إلا هذا أنا يوم ابتديت

أنطق حروف ٍ تلعثم في لساني لا أنمدحت

هذا انا يوم الحياه فنظرتي عشرين بيت

ومسجدين .. ومدرسه من طين كم فيها اصطبحت

هذا أنا وأصبحت اتمتم: هذا انا حتى بغيت..

.. أختنق .. بس القدر عيّا على موتي .. وطحت

وصاح صوت الطفل فيني: أنت من وين ارتميت

قلت أنا المستقبل اللي فيه كم همت وطمحت

أمس كنت أبيك تكبر .. بس والله لو دريت

أني اللي عشت لأجله متّ عندك وأسترحت

لو دريت إن الزمان يجرّ رجلي .. ما عديت

ولو دريت إن البحور بلا مواني .. ماسبحت

كان دربك لي طويل .. وكل ماشفتك هويت

قلت لك: كبوة جواد .. وما كبيت إلا وجمحت

ليه تسمعني وتمشي؟! آه ليتك ما مشيت

و آه ليتك من كثر عثرات الأيام أنتصحت

ضاعت احلامي .. وظلّ الحزن فيني .. وأهتديت

للطريق اللي يوديني على دمعي .. ورحت

يالحزن .. ليتك مثل دمعي وتنزل لا رقيت

بس أعرفك .. لو مسحت الدمع تبقى ما انمسحت!

كان حلمي .. في وجود إنسان يبكي لا بكيت

وصار حلمي .. في وجود إنسان يفرح لا فرحت

كنت أشوف الناس مثلي كل ما جعت وضميت

مادريت إن الأوادم ناس فوق .. وناس تحت

آه ياأول ذكرياتي خذني فحضنك نسيت

لأسألك عن وجه ابوي اللي معه ياما سرحت

خذني فحضنك أبغفى .. ياه مبطي ماغفيت

وإن لمحت دموع عيني .. سو نفسك مالمحت

خذني فحضنك .. وبعثر في جروحي وإن قضيت

هزّ لي كتفي .. وقل لي: عيب تبكي لو سمحت

إضحك .. وعلّم زماني من أنا .. ومن وين جيت

طقّ باب الحزن .. واصرخ فيّ لامني فتحت

وضمّني يمّك .. وكمّل ضحكتك لامن بكيت

ودي أذكر كيف كانت ضحكتي لامن فرحت!

حنين الأشواق 25 - 4 - 2022 06:36 PM
رد: ديوان ونبذه عن الشاعر فهد المساعد
 










اعز انسان


صوّت حبيبي وقبل أقول ياعونك

شكى جروحه ورحت أشكي له طعوني

يقول مقدر أعيش اليوم من دونك

وأقول حتى ولو ماعشت من دوني

يمكن أنا اكون أعز إنسان ف عيونك

بس انت والله كل الناس ف عيوني

لا صرت ربعي وداري فيّة جفونك

وش دخّل الناس خل الناس يجفوني

يكفيني إن انت لا من قلت وشلونك

تطيب كل الجروح ويختلف لوني

وإن كان منتب مصدقني على هونك

تعال وطالع دروبي وين ودوني

أصبحت أجامل عداي اللي يحبونك

وأكره مشاهد عداك اللي يحبوني

ومن كثر ما احب واكره عنك واصونك

أصبحت دفتر مشاعر وأنت مضموني

إن غبت عني شعرت بلذة طعونك

وإن شفت زولك شعرت بقيمه عيوني

حنين الأشواق 25 - 4 - 2022 06:36 PM
رد: ديوان ونبذه عن الشاعر فهد المساعد
 










صالات المطار


قبل اسافر كنت جالس في زمان الأنتظار

ارتشف هم المكان .. وكل همي حاجتين

كنت خايف من يباس .. وكنت خايف من خضار

كنت اخاف انك تجين وكنت خايف ما تجين

لين شفتك من ورا بيبان صالات المطار

مقبله من كثر شوقك .. كنت اشوفك تركضين

مرةٍٍ ركضك يمين ونظرة عيونك يسار

و مرةٍٍ ركضك يسار ونظرة عيونك يمين

تايهة .. ما كنك الا ضحكةٍ وسط انكسار

ساكته .. ماكنك الا دمعةٍ فيها حنين

خايفة .. وجلة .. حزينة .. يعني كنتي بأختصار

تشرحين لكل جاهل معنى كلمة عاشقين

بعدها جيتك ولدّت عينك ودار الحوار

من كفوفي دمعتين ومن كفوفك دمعتين

كنت اصد وكنتي انتي ثايره مثل الشرار

ماعلى لتغة لسانك غير كلمة وين؟ وين؟

واذكر اني رحت قبل ابدي لك ايّة اعتذار

رحت حتى قبل اطيّب خاطرك في كلمتين

لكن انتي عارفتني زين واللي صار صار

سامحيني واذكريني قدّ ماانتي تقدرين

اذكريني لاانتهت للشمس رحله مع نهار

واذكريني لاصحى للصبح ورد الياسمين

واذكريني لا لمحتي في ليالي البرد نار

واذكريني لا سمعتي للمطر صوت ٍ حزين

اذكريني واذكريني واذكريني .. بأختصار..

اذكري فهد المساعد قدّ ماانتي تقدرين!

حنين الأشواق 25 - 4 - 2022 06:37 PM
رد: ديوان ونبذه عن الشاعر فهد المساعد
 










في خاطري كلمتين


من عز نومي صحيت وشفت في عيني

دمع تهادى على جفني وأنا غافي

سترت دمعي بكمي قبل يغريني

وأخذت هذا الجسد من باقي لحافي

وسريت تايه ورا خطوات رجليني

لا الوجه وجهي ولا أوصافي هي أوصافي

أمشي وأقول لطريقي لا توديني

لعيون ناس تبي تدري عن الخافي

أمانتك.. خلها ما بينك وبيني

خابرك يالدرب خوة عمر وسنافي

ما ودي الناس تدري وش يبكيني

كرامة النفس ورث أبوي وأسلافي

أمشي وأحس الخناجر في شراييني

والبرد يمشي وراي وينهش اطرافي

وحيد والليل بردونه يغطيني

تقول كن البلد روح بها السافي

إلين ما أوحيت لي صوت يناديني

صوت أعرفه مثل ما أجهل وش خلافي

قمت أتلفت وانادي لا تخليني

ما غيره.. الصوت هذا صوته الدافي

ولمحت زوله من أقصى الدرب لافيني

مدري وش اقول لكن حي ها اللافي

تعال.. شف غيبتك كيف أثرت فيني

تعال.. شفني وأنا أغرق عقب مجدافي

تعال.. خذني ورحبي من عناويني

تعبت أعدي على جمرك وأنا حافي

تعال واقطف بصوتك زهرة سنيني

كل المواعيد عقبك شمعها طافي

تعال وازرع خصل شعرك بكفيني

بضمها لين أحس بليلك الظافي

تعال وشفيك خايف؟ أنت ناسيني؟

قطعت صوتي عليك وطال ميقافي

حتى بديت أشعر أن الحب معميني

وان أنت حلم عثى فيني وأنا غافي

لكن أمانة ترى اللي في كافيني

إن رحت منك كذا ما رحت متعافي

بصدق الحلم وأحذر لا تصحيني

في خاطري كلمتين إن قلتها كافي

أمانة الله عليك إن غبت عن عيني

لا يكون قلبك مثل قلب الزمن جافي

مع كل دمعة تذكر رعشة يديني

ومع كل ضحكة تذكر قلبي الوافي

حنين الأشواق 25 - 4 - 2022 06:38 PM
رد: ديوان ونبذه عن الشاعر فهد المساعد
 










اللي تركني


اللي تركني وأنا في عز غربالي

بعد الشدايد وش اللي ذكره فيني

يبغى زمانه يعود ويرجع الغالي

وش لون يرجع بعد ماطاح من عيني

لاالوقت وقته ولاله شي في بالي

أنا نسيته مثل ماكان ناسيني

ياما تمنيت نظرة منه في حالي

ياما تمنيت صوته لويناديني

وأقول لااظلم علي الليل بلحالي

الله يجيبه يشتت غربة سنيني

من كثر ماكان طيفه دايم قبالي

احيان احسه معي وتضمه ايديني

ولامن تنبهت لين وجيه عذالي

كلٍ على ماطرى باله يسميني

ليته تركني بعد هذا على فالي

زي ماتركته بعدقتله بساتيني

من بعد ماصار جاب بلسانه الحالي

يبغى يرجع زمان بينه وبيني

قولوا له اني مااحبه كثر ترحالي

او لا حرام يتضايق والا يبكيني

قولوا له اني احبه بس من تالي

ان راح والا رجع ماعاد يعنيني

حنين الأشواق 25 - 4 - 2022 06:39 PM
رد: ديوان ونبذه عن الشاعر فهد المساعد
 










سحابه


جف الكلام ومدت يدينها فوق: ..

.. أخترت هذي .. وأنت شف لك سحابه

قلت .. ويديني تحتضنها مثل طوق ..

:أخترت هذي هذي أكثر رحابه

هذي دفا صوتٍ من البرد مخنوق

هذي سؤالٍ نصف عمري جوابه

هذي هي اللي عرّفتني على الشوق

هذي قدر .. ماكنت حاسب حسابه

قطعة حزن في جيب بالي ومشقوق

ومضة فرح في عيون ناسٍ غلابه

أن سولفت في ثغرها لمعة بروق

وإن سرّحت في عيونها صمت غابه

واليا اضحكت نورٍ من الفجر مسروق

واليا بكت تحزن عليها الكآبه

حبي لها لوأدري ان فيه مخلوق

قدّ حبّ مثله .. قلت: ياللغرابه

هالآدمي من وين له قلب وعروق؟!

والصبر هالمسكين من وين جابه؟

وأنا أتكلّم .. ردّت عيونها فوق

ثم تمتمت: من هي هالأكثر رحابه؟؟

قلت ويديني تحتضنها مثل طوق

في ذمتي ماشفت غيرك سحابه

حنين الأشواق 25 - 4 - 2022 06:39 PM
رد: ديوان ونبذه عن الشاعر فهد المساعد
 










المدينه والغريب


جا يشوف الحال كيفه بعد ماهزه حنينه

وقبل يسألني سألته: كيف حالك يالحبيب؟

قال: انا كني غريب ضيع دروب المدينه

قلت: انا كني مدينة تنتظر رجعة غريب

قال: اجل وش فيك تكره سيرة الحب وسنينه

قلت: أجل وش لون ما اكره سيرته دامك تغيب

انت لا من غبت حتى مرايتك صارت حزينه

كيف ما تبغاني أحزن وانت لي حظ ونصيب!؟

الهدايا والرسايل والمكاتيب الثمينه

والليالي والقمر والريح والكون الرحيب

كل ما تبعد .. تجيب الشعر ليه من يدينه

و تقعد جروحي تودي فالطواريق وتجيب

يا بعد كل القصيد ونزوة حداه وانينه

لا ذكرتك لاح بيت .. وطاح ورد .. وفاح طيب

وان نسيتك ما نساني صوتك المبحوح لينه..

.. ياخذ لجرحي بثاره من خطاياك ويطيب

وبعد هذا جاي ترمي ذنبك بوجه المدينه

ما دريت ان المدينه كلها شمعة غريب

تووفه الحربي 25 - 4 - 2022 07:36 PM
رد: ديوان ونبذه عن الشاعر فهد المساعد
 
رووووعه الله يعطيك العافيه

الــســاهر 25 - 4 - 2022 07:59 PM
رد: ديوان ونبذه عن الشاعر فهد المساعد
 
نشاطكم يثمر بعطاءه يوماً بعد يوم


ورمز تميزكم يوازي حدود التميز
مواضيعكم شيقة
ومفيدة
وعطرة باقلامكم النقيه
لا تحرمونآإ من نبل أقلآمكم
كونوآإ بخير دائمـأاً

همسه الشوق 25 - 4 - 2022 09:05 PM
رد: ديوان ونبذه عن الشاعر فهد المساعد
 
مًوٍضًٍوٍعًٍ كَآلمًطُْرٌٍ آلهٍَتُِِّْآنْ يَشًِْغًفْ آلقٌٍلبٌَِ بٌَِرٌٍؤيَتُِِّْهٍَ
وٍآنْ يَظْل عًٍبٌَِقٌٍ تُِِّْوٍآجًِْدًٍكَ يَلطُْفْ آلقٌٍسٌِِّمً وٍآبٌَِصٍْآرٌٍنْآ دًٍوٍمًآ بٌَِجًِْمًآل مًآ تُِِّْقٌٍدًٍمً
سٌِِّلمًتُِِّْ يَمًنْآكَ عًٍلى مًآ قٌٍدًٍمًتُِِّْ وٍسٌِِّلمًتُِِّْ عًٍيَنْآكَ عًٍلى مًآ آنْتُِِّْقٌٍتُِِّْ
نْنْتُِِّْظْرٌٍ مًنْكٍَ هٍَطُْوٍل طُْلتُِِّْكٍَ مًرٌٍهٍَ آخٌِرٌٍى مًنْ خٌِلآل آبٌَِدًٍآعًٍآتُِِّْكَ آلمًمًيَزٍُة
بٌَِآرٌٍكَ آللهٍَ فْيَكَ
لكٍَ مًنْـِِّـِِّـِِّ آجًِْمًل تُِِّْحٍّيَة ـِِّـِِّـِِّـِِّـِِّيَ

حنين الأشواق 27 - 4 - 2022 01:03 AM
رد: ديوان ونبذه عن الشاعر فهد المساعد
 










توفه
وجُودكـ فَرحَة
أدَامَكَـ اللهُ نَعيمًا وَارِفًا فَوق المَكَانِ وَسَاكِنِيهـ يَمتَد 
وَطَافتْ حَولَكـ أطيَار السَّعد 
وسَقَاكَـ الله الخَيرَ حَتَّى تَرتَوي وَتَبلُغَ أعَالِي المَجْد
شُكرًا لكـ

حنين الأشواق 27 - 4 - 2022 01:03 AM
رد: ديوان ونبذه عن الشاعر فهد المساعد
 










ساهر
وجُودكـ فَرحَة
أدَامَكَـ اللهُ نَعيمًا وَارِفًا فَوق المَكَانِ وَسَاكِنِيهـ يَمتَد 
وَطَافتْ حَولَكـ أطيَار السَّعد 
وسَقَاكَـ الله الخَيرَ حَتَّى تَرتَوي وَتَبلُغَ أعَالِي المَجْد
شُكرًا لكـ

حنين الأشواق 27 - 4 - 2022 01:03 AM
رد: ديوان ونبذه عن الشاعر فهد المساعد
 










خفوق
وجُودكـ فَرحَة
أدَامَكَـ اللهُ نَعيمًا وَارِفًا فَوق المَكَانِ وَسَاكِنِيهـ يَمتَد 
وَطَافتْ حَولَكـ أطيَار السَّعد 
وسَقَاكَـ الله الخَيرَ حَتَّى تَرتَوي وَتَبلُغَ أعَالِي المَجْد
شُكرًا لكـ

حنين الأشواق 27 - 4 - 2022 01:04 AM
رد: ديوان ونبذه عن الشاعر فهد المساعد
 










هدية عيد ميلادك


حبيبي جيت اقدّم لك هدية عيد ميلادك

وانا متأكد اني لو نسيتك مانقص قدري

ولكن قلت ادوّر أي شيّ يناسب ّعيادك

تصفحّت الهدايا لين ضاق بشوفها صدري

أبي شي ٍ يجمّلني معك لا فاح رينادك

مابي شي ٍ أمدّه والخجل من فوقي وحدري

وقلت آشوف بعض الناس قبل يحل ميعادك

وش اللي من هداياهم يليق بوجهك البدري

بعضهم جاب ورد .. وشفت كل الورد مافادك

وانا اصلا أعتبر من جاب ذاك الورد مايدري!

لأن الورد لو مازاد بين إيديك مازادك

تركت الورد ذبلان .. وذكرت اللي سروا بدري

هديتهم قفص وطيور .. قلت ف عيد ميلادك

اسوّي مثلهم واهديك طير ٍ في قفص صدري

حنين الأشواق 27 - 4 - 2022 01:05 AM
رد: ديوان ونبذه عن الشاعر فهد المساعد
 










دفتر اوجاعي


اكتب واسلّي خاطري ب الكتابه

كود التهي في نظم الابيات وانساه

واثر القصايد منه قامت تشابه

من وين اقلّب دفتر اوجاعي القاه

هذي قصيده قلتها في عتابه

وهذي قصيده قلتها يوم فرقاه

وذيك القصيده قالها من عذابه

يكتب قصيدٍ منكسر بس مااحلاه

ويقول: جابه كان تقدر تجابه

واقول شعرك لعن ابو من تحداه

ويروح يضحك ما اقتنع في الاجابه

ويقول: شعرك زين بطّل محاباه

واقول: طبعا زين لأنك زهابه

لاصرت روح البيت وش لون تبغاه؟

واليوم ذاك الوقت جمّع شبابه

واقفي ولاادري صاحبي وين وداه؟

رضيت مدري ذل ولا مهابه

ابعد واهلّ الدمع لأيام ذكراه

الشعر والليل وبياض السحابه

والضحك والحظ الردي والمعاناه

كلّش يذكرني بوقتٍ غدابه

ياوين أبرمي هالجسد فيه وانساه

حنين الأشواق 27 - 4 - 2022 01:06 AM
رد: ديوان ونبذه عن الشاعر فهد المساعد
 










ليه؟


الباب هذا باب بيتك .. بس ما يفتح عليه!

الباب هذا لو فتحته .. تنفتح ليّ الحياه

وانا وراه .. احسّ كنّ الدمع تخنقني يديه

احسّ كنّه حدّ منفى .. والوطن كلّه وراه

صوتك وحشني يا وطن .. وأحترت وين القاه فيه؟!

وأمسيت اغني به .. وانا اللّي كنت اغنّي له معاه!

وحشني صوتك يا وطن .. وأمسيت اغنّي: ليه؟..ليه؟

·ليه الكلام اللي نقول يموت في سكة صداه؟!

ليه الدواير تنتهي مع دربها اللي تبتديه؟!

ليه الشوارع ساكته .. والناس كلٍ في هواه؟!

ليه اليدين تصدّ عن شيٍٍ تبيه وتشتهيه؟!

..يوم العيون تسابق الجايع على لقمة عشاه!

علمّتني في صف أول حبك .. ان اكبر سفيه..

.. اللي اذا حسّ بغلا خلّه يفرّط في غلاه

طيّب علامك .. كل ما زدتك غلا .. تزداد تيه

آهات والله يا وطن..حتى ولو ما قلت: آه

حنين الأشواق 27 - 4 - 2022 01:06 AM
رد: ديوان ونبذه عن الشاعر فهد المساعد
 










صمت المكان


كل ماطابت هجوسي .. رحت اسولف للزوايا

عن فتاة ٍ كان يملى صوتها صمت المكان

عن فتاةٍ غير كل اللي قرينا في الحكايا

صمتها طيش وقصيد .. وطيشها صمت وأمان

باقي ٍ فيها من اللي في طفولتها بقايا

شيطنة ضحك وسوالف .. رقّة شعور وحنان

كم تزاعلنا .. وكلٍ ينتظر دمح الخطايا

ثم سكتنا .. والزعل من بيننا مثل الرهان

لين ماتنهي زعلنا ضحكة ٍ بين الشفايا

ضحكة ٍ غابت ولكن شانها مازال شان

ماذكرت الا عيوب .. ولاتركت الا مزايا

سوّد الله وجه حظي .. والليالي .. والزمان

راحت وخلّت دلعها صورةٍ بين المرايا

وين مالدّيت فيها شفت ضحكات الثمان

وشفت شامه فوق جمره سوّت بقلبي سوايا

آه ياهالحال منها كيف صار .. ووين كان!

بس ياذاك الخفوق اللي تلجّ أبك الحنايا

شدّ حيلك .. لاتخاذل .. مايطيح الا الجبان

مالك الا ذكرياتك وأنت من بين الهدايا

حول ذاك الورد ابو عطرٍ يهز الشمعدان

كل ماخلّت وراها غالي ٍ ريم الصبايا

حتى والله من غلاها .. رحت وأغليت المكان

حنين الأشواق 27 - 4 - 2022 01:07 AM
رد: ديوان ونبذه عن الشاعر فهد المساعد
 










نبض القصيد


ماطرق جفن المحبه رمش ماله في السهر

وما لمس نبص القصيدة شاعر جاها كذا

والله اني لاتعزوى واضرب حصون الخطر

لوعرف ورد المحبه كيف يلعب بالشذا

ياسحابه صيف منها مابعد شفت المطر

مغريه مثل الطموح ومشغله مثل القذا

رحلتي شابت تمنى مبتداها بالخبر

والنهايه ضاع وقتي بين هذا هو وذا

ياكبر حظ السعادة طول عمره ماصغر

منهو اللي لاعرفها مابغاها له غذا

ماعرفت الا جروح مالها غير الصبر

دام وقتي لاعطاني جرح يبطي ماخذا

بين جرح وبين خوف وبين طعنات القدر

طب ياحظي تخير أو تغير ياوذا

وانت ياللي لو اقول احبك ماتسر

في كلمة في خفوقي يرتكبها لاهذا

ماملى عين المحبه غير وجهك والسهر

فوق نبض من نضمته مابعد قلته كذا

حنين الأشواق 27 - 4 - 2022 01:07 AM
رد: ديوان ونبذه عن الشاعر فهد المساعد
 










بسم الله عليك


جيت في ليلة وداعه تايهٍ بين البيوت

وصحت: وينك؟!.. جيت اوادع عمري اللي ضاع فيك

ما سمعت الا صدى صوته وكان آرقّ صوت

ينطق اسمي..ثم يهمس: من متى وانا احتريك؟!

قلت وهمومي تغافل زفرة الحزن وتفوت:

هذا انا جيتك..يا ليت الموت جاني قبل اجيك

بعدها يا دوب عدّت عبرته حد السكوت

قال وعيونه تغارق دمع: بسم الله عليك

قلت: يا ابن الناس عادي ماورى هالموت موت

وش وراها لا فقدت عيونك ولمسة يديك؟!

حنين الأشواق 27 - 4 - 2022 01:08 AM
رد: ديوان ونبذه عن الشاعر فهد المساعد
 










سكة الذكرى الحزينه


مرّني طيفك .. وطيفك صاحبي مدري عدوّي

جايبٍ صوتك .. وصوتك سكة الذكرى الحزينة

قال أنا جوّي تكدّر .. قلت: ماهو كثر جوّي

قال فرقانا غبينة .. قلت: وأكثر من غبينة

قال: أنا ب أموت من غيبتك قل لي ويش أسوّي؟

قلت: أنا أبغى الموت في غيبتك .. قل لي بس وينه؟!

قبل ترحل .. كنت أقول بيسرح أيام ويضوّي

مثل ماعودني اليا اشتقت له جابه حنينه

بس هالمرة ثمان شهور وضلوعي تدوّي

كل يوم أشتاق لك .. يلعن أبو الشوق وسنينه

كل ماعشمت قلبي .. قال ياضلوعي تقوّي

ورحت أنا وياه نرقب رجعة اللي فاقدينه

نوب أقول اليا رجع بكون في قمة هدوّي

ونوب أقول الا أبزعل وأتلى مابيني وبينه

كل يوم أجلس على جال البحر وأقول توّي ..

.. لاسألني: مافقدت الحلم في لمسة يدينه؟!

مادريت أن البحر ماقال لأمواجه تروّي!

و مادريت أن الغرق هو حجّة غياب السفينة

مادريت .. أو مابغيت أدري .. ولاأدري وش بسوّي

لو رجعت .. وشفت طيفك في الممرات الحزينة

وين ابنسى وانت طيفك صاحبي مدري عدوي

مارضى يترك لغيره شبر واحد في المدينة!

حنين الأشواق 27 - 4 - 2022 01:08 AM
رد: ديوان ونبذه عن الشاعر فهد المساعد
 










ثلاث سنين


ياعين هلي دموع الوجد وانهمري

محتاج لي دمعتين تعيد ترتيبي

نويت دمر الزمان اللي نوى دمري

بايعك ياطيبتي شاريك ياطيبي

والدانه اللي تغنّج كنها القمري

أمنتّكم بلّغوها يا مناديبي

لا عاد تشفق على نخلي ولا تمري

ولا عاد تشره علي في قل ترحيبي

إن كان ربي عطاها لونها الخمري

الله بنفسي معوضني فقر جيبي

أمنتكم بلغوها تحتري جمري

مادام مافاد معها حسن تهذيبي

إن عشت والله لأمشيها تحت أمري

وأحس فيها تعذّب كثر تعذيبي

هذريت فيها ثلاث سنين من عمري

وإن قاله الله لأخليها تهذريبي

حنين الأشواق 27 - 4 - 2022 01:09 AM
رد: ديوان ونبذه عن الشاعر فهد المساعد
 










الدلوعه


إيه أعرفك بنت عز وكلمتك مسموعه

وأدري إنك من خلقتي في ظلال وفيّه

مالعب فيك الزمان ولاقرفتي جوعه

ولاوقفتي من همومك وقفة محنيه

أدري ورب اليتيم اللي يهل دموعه

مابعد هلت دموعك في ضحى عيديه

بين حضن أبوك وأمك وردةٍ مزروعه

طول عمرك مافقدتي لمسة الحنيه

إيه أعرفك وأعرف إن الناس لك متبوعه

وأدري إن أمرك مجاب وحاجتك مقضيه

بس أنا من فضل ربي هامتي مرفوعه

ورث أبوي وراس مالي عزوة جبريه

ماأنحنيت إلا لمخافة ربي المشروعة

ولابعد دفقت دم الوجه أمد ايديه

بدوي ماعرفت الضحكة المصنوعه

احمد الله من خلقت وطيبتي فطريه

قانع في حكمة الله ماشي في طوعه

ماحسبت حساب دنيا ناسها طرقيه

إيه أنا ياأم الترف قلبي غدا موضوعه

الفراق اللي بلا رجعه وطاري جيه

بس روحي سايري قلبك وهدي روعه

واعذريني .. وإلا عادي ازعلي عليه

دامها وصلت لذل النفس يالدلوعه

والله ان يعيش راسي ماانحنى لبنيه

حنين الأشواق 27 - 4 - 2022 01:09 AM
رد: ديوان ونبذه عن الشاعر فهد المساعد
 










خلاص


ياصغيّر السن قدرك طاحت أبراجه

الجرح خلّى الصخر ينطق ونطقّني

خلاص ماعاد تعني لي ولا حاجة

رح.. جعل ربي يوفقك ويوفقني

من بعد ماكنت نور العمر وسراجه

اليوم صرت الظلام اللي يطوقني

عطيتك أكثر من اللي كنت تحتاجه

أسرفت ف الحب ..لين الحب وهقني

خلاص.. مالي ومال الحب وإزعاجه

مالي ومال الدروب اللي تضايقني

تعبت أضمّ البحر وأهدِّي أمواجه

تعبت أجامل وأشوف الوقت يسرقني

شكواي للي عليه الضيق وإفراجه

اللي إذا شاء.. يرحمني ويرزقني

أما أنت يابو جبينٍ عقّّد حجاجه

لاعاد تسأل: علامك ما أنت طايقني؟

الناس كلٍ على دربه ومنهاجه

وأنا عن الناس مابه شي يفرقني

إلا أني دايم أحب الصدق وأواجه

مخلوق .. والله على هالوضع خالقني

حتى رفيقي ضماد الجرح وعلاجه

على كثر ما أتمّسك فيه .. صدقّني ..

لو أدري إنه مرافقني على حاجه

لأمسّكه حاجته.. وأقول: فارقني

حنين الأشواق 29 - 4 - 2022 02:18 AM
رد: ديوان ونبذه عن الشاعر فهد المساعد
 










وحده بوحده


ياغايبه وان كان فيها جماله

تجمّلي ياام الحلا والظفاير

بالله شوفي صاحبك كيف حاله

شوفيه في غيبتك وشلون صاير؟!

صارت حياته ضيق خلق .. وبطاله

هم .. وسهر .. واوراق شعر .. وزقاير!!

يعني حبيبك صار حالته حاله

ماباقي الا انه يدّن العباير

الله لامنّه ذكر مامضاله

قبل الدواير ماتجر الدواير

يوم الطفوله والشقا والجهاله

يوم الصغاير في عيونه كباير

ايام كان معانده راس ماله

ويسوق لهبال الشقاوه بشاير

ياما امتلى بالحب والطيش باله

وياما امتلت من شخبطته العواير

يكتب عليها: عااااشقك للثماله

ويخطّ توقيعه: جريح الضماير

ياما اشتكاه ابوك في بيت خاله

وياما تحصّل من هواك العزاير

مره حلف بأنه يبّطل هباله

وقبل يكمّل .. فك اخوه الستاير

ثم طالع الشباك.. لينك قباله

وفي اقل من لمح البصر جاك طاير

على صغر سنه ممّيل عقاله

كااااشخ وناسي لايصك الزراير

لاشافك يتمتم لحاله بحاله

لعيون هالشوفه تهون الخساير

ولاشاف زول ابوك حذّف نعاله

الحب جاير .. لكن العود جاير

طفلٍ يتيم ورغم الأحزان داله

مايدري ان حظه مع الوقت باير

كنتي طموحه .. كنتي أغلى حلاله

كنتي وصرتي بس ياام الظفاير

طفلٍ زرع من ضحكتك في خياله

لين اثمرت شعرٍ هزاله حراير

لاتتركينه في غيابك لحاله

بالله شوفي كيف هالطفل صاير

ووحده بوحده كان عندك عداله

اتبّطلي غيبه .. وابطّل زقاير

حنين الأشواق 29 - 4 - 2022 02:19 AM
رد: ديوان ونبذه عن الشاعر فهد المساعد
 










الرساله


ياصاحبي جيتك أشكي لك من أحوالي

جيت .. وما دامك رفيقي ليه اطولها؟!

العلم ومافيه يا أول وآخر أمالي

عندي رساله ولا أدري كيف أوصلها

للي سبتني وانا من قبلها سالي

أبيك توقف معي وتروح تسألها

وش فيها تفتح علي أبواب عذالي

وتحمّل النفس حاجه ما تحمّلها

وش فيها رغم الوفا تتركني لحالي

وأنا لجفاها تركت الدنيا ب أكملها

إن كان هذا زعل .. علمّها يالغالي

ماكان قصدي ورب البيت ازعلها

علمّها واللي يخلي قلبك الخالي

عن ضيقتي .. وين وصلت من تجاهلها

علمّها كم لي وانا ماشلت جوالي

كله علشان ما أقلّب رسايلها

وعلمها وشلون لا مرت على بالي

أروح وأضم صورتها واقبّلها

وعلمها كيف أنشغل عن كثرة أشغالي

وأسرح وأغمض عيوني واتخيلها

علمها عني .. وعن همي .. وغربالي

علمها عن كل حاجه في تجهلها

وإن شفتها دنّقت .. تبكي على حالي

إنسى الكلام .. وتذّكّر كلمه وقلها

قل: شاعرك يعتذر .. ويعاهدك تالي ..

إنه يرتب حساباته من أولها

ويقول: حتى القصيد اللي على بالي

والله ما عاد أكتبه كانه يزعلها

حنين الأشواق 29 - 4 - 2022 02:19 AM
رد: ديوان ونبذه عن الشاعر فهد المساعد
 










القلوب الطيبه


يادلال ان ضاع صوتي لايضيع اللي بقى

لاتضيع الصورة اللي في خيالك يادلال

يابعد طول المسافة والكلافة والشقا

يابعد كل الحياة وكل ماجاب الخيال

ماورى سود الليالي والفراق إلااللقا

وش تبين بهالدموع الزرق يابنت الحلال؟

اتركي عنك الدموع وخلي الحزن يهقى

ان ماله فالقلوب الطيبة أية مجال

كلها جرح ونشوف الليل لامنه اتقى

في جلال الصبح جعل الصبح مايلقى جلال

اقبلي قبل نتفارق والوصال ابو النقا

ودي آخذك بيدينك والنقا ولد الوصال

اقبلي واليوم يوم الشعر كانه مارقى

يم ذيك الغيمة اللي كنها طلبة تعال

لايجي باكر يغني: ياسقى الله وسقى

كل شي ان طال زال الا القصايد ماتزال

لعن ابو ذكرى القصايد كان ذكراها محقا

كل بيت وذكرياته في ملامحها سؤال:

وينها اللي كنت انا والصبح ويديها اشققا؟

اي فال اللي رماني في خيالك اي فال؟

آه كان الشعر راح ورحتي انتي وش بقى

مابقى لي غير اجر الصوت وأسري يادلال

حنين الأشواق 29 - 4 - 2022 02:20 AM
رد: ديوان ونبذه عن الشاعر فهد المساعد
 










الأسرار


يا رفيف الماء .. وفجر العيد .. وأحزان المواني

يا أكثر أهل الأرض طيبة قلب .. وأسرار دفينه

المكان اللي هنا .. مليان ضحكات، وأغاني

والكلام اللي بغيت أقول .. يحتاج ل سكينه!

شوفي الركن البعيد هناك .. كنه صدر حاني

هذا هو اللي يليق ب شاعر وبنت حزينه!

أنسي الشارع، وعتمات الزوايا، والمباني

هاتي يدينك نلف الغيم ونشكل مدينه!!

عندي الليلة كلام وصمت .. وأخاف الثواني

تظلمه .. أو تظلم اللي فيه كم ضاعت سنينه

بس لازم تسمعين اللي أبي ولا تراني

لو ب أعيده لك .. نسيت .. ورحت أقول اللي تبينه

شي واحد قبل ما أبدأ .. ما أبي أي شي ثاني

يخطر ف بالك .. وأنا أكشف لك شعور تجهلينه!

إن أنا .. وبكل ما تحمله أحبك من معاني

كنت،وراح أبقى أحبك .. لين .. مدري وش هو لينه!!

بس والله ماقدرت أنسى .. ولا همي نساني

لا ذكرت إنسان .. فيه أسرار مابينك وبينه

كل ما تطري علي فكرة هواك الأولاني

أشعر إني أنطعن مليون مره من يدينه!

أشعر إن عيونك.. الله ما خلقها إلا عشاني

كيف كانت تبتسم له؟!.. قولي إنك تخدعينه!!

صورة إنه كان يمسح دمعك .. تزلزل كياني

وكيف كان يلم شعرك .. ويتبعثر في يمينه

حتى اسمك يوم رحت أدلله .. حظي رماني..

بنفس الاسم اللي يقول .. بذمتك ماهي غبينه!؟

وكني اللي .. كل ما أناديك بالاسم الفلاني

أطلب النسيان .. يترك منه شي تذكرينه!!

لا تظنيني أناني .. لا .. أنا مانيب أناني

لو سلمت من الغرق . ب أموت في ظهر السفينه!

يا إني ما أكمل وأعاني .. أو أكمل ثم أعاني..

كل ما اسمع طاري اسمه .. أو تجي عيني في عينه!

أينا كان الضحيه؟.. وأينا اللي كان جاني؟

مدري!.. ولكن قراري لازم إنك تقبلينه:

مثل ما أكره فكرة إنه واحدٍ ياخذ مكاني

ما أقدر أجلس في مكان إنسان.. كنتي تعشقينه!

حنين الأشواق 29 - 4 - 2022 02:20 AM
رد: ديوان ونبذه عن الشاعر فهد المساعد
 










لا تسافر


قلبي له اليوم .. ثالث يوم موجعني

وعيني لها اليوم ثالث .. تجمع طيوفك

والبال كنّه على دربك يوزعني

ولساني ماكنه الا خلق لحروفك

لاالنوم نافع .. ولا التفكير نافعني

انام واصحى على الباقي من وصوفك

بالله قلي .. شعوري هذا وش يعني!

؟طمنّي .. الله يطمن همّك وخوفك

بيني وبينك .. ترى اللي صدق ضيعني ..

.. ان انت في اخر لقا .. شارح لي ظروفك

مدري وش اقول .. لكن تدري .. اسمعني

خابرك وافي .. وأبيك تتم معروفك

ان كنت ناوي تسافر .. لاتودّعني

بس انتبه .. لا تسافر قبل مااشوفك

حنين الأشواق 29 - 4 - 2022 02:21 AM
رد: ديوان ونبذه عن الشاعر فهد المساعد
 










ليل يا ليل


ليل ياليل .. يوم الناس سمّوك ليل

هو عشان السهر وإلا عشان المنام ..؟

شف عيوني وشف وشلون جسمي نحيل

لعنبو هالغرام إن كان هذا الغرام ..!

آه ياقلبي اللي مابقى فيك حيل

من كثر ماطواك الشوق ولد الحرام

قلت لك لاتميل إن طعتني لاتميل

بس هذا أنت ملت وماسمعت الكلام

يوم ذيك الصبية أم ذاك الجديل

جت تهادى وتمشي مثل مشي الحمام

إنكسرت وقعدت تحط فيّ وتشيل

لين رحت وخذتني في طريق الهيام

قبل أسلم عليها كنت عابر سبيل

وصرت ديرة غرام وعشق بعد السلام

كنت اقول: أي حب وأي خل ٍ وخليل

الهوى ماوراه إلا التعب والملام

لكن اليوم شفني ضعت وأكبر دليل

اني امشي واهذري إبتسام .. إبتسام

حنين الأشواق 29 - 4 - 2022 02:22 AM
رد: ديوان ونبذه عن الشاعر فهد المساعد
 










العذر


يعني كذا ياأم الوفا والمحبة

كذا المحبة والوفاء ياوفيه

أغيب عنك أيام ولا أتنبّه

إلا وانا أشوفك زعلتي عليه

وش زعلك؟ وش هز قلبك وشبه؟

يعني عشاني غبت صارت قضيه!

ياام القوام اللي من أدناه هبه

يميل كن الخيزران أدميه

وأم الجديل اللي من يخاف ربه

يذكر عليه الله ويذكر نبيه

إن كنت مخطي فالخطا مايجبه

إلا العذر وانا اعترف بالخطيه

وهذي بعد من فوق الأعذار حبه

لاتزعلين الله يخليك ليه

حنين الأشواق 29 - 4 - 2022 02:22 AM
رد: ديوان ونبذه عن الشاعر فهد المساعد
 










ياصاحبي


ياصاحبي بالله خل التغلي

وقت التغلي والدلع ذاك ولى

ماعاد معنا وقت تربط واحلّي

دامه عدو الحب بالصوت علّى

خذها صريحه .. حط نفسك محلي

ادمح لك الزلاّت قدر وتغلّى؟

ولّي حياةٍ جابت الذل ولّي

لابو حياةٍ صرت فيها تسلى

قولوله اني بنسحب منه كلّي

خلوه يدري من تغلّى يخلّى

حنين الأشواق 29 - 4 - 2022 02:23 AM
رد: ديوان ونبذه عن الشاعر فهد المساعد
 










كذبه كبيره


اتعبتني عيوني قدّ ماهي بصيره

واتعبتها يديني قدّ ماهي جفول

قلت: خيره.. ولكن وينها ووين خيره؟!

لا عيوني تكفّ.. ولا يديني تنول

هيه.. وين انت يا للي كان ما فيه غيره؟!

يفهم اللي اقوله قبل حتى لا اقول

رحت ادوّر حبيبٍ مثلك ابغى استشيره

واثر ما كل زولٍ ينتعوّض ب زول

جيت ناسٍ تزوّد حيرة القلب حيره

قلت: اطيع الزمان وكل شدّه تزول

قالوا: العمر يكبر.. قلت: كذبه كبيره

عمر الانسان يصغر كل ما هو يطول

قالوا: الشعر بيت.. وقلت: انا الشعر ديره..

..اعقل اللي سكنها فيه طيش مهبول

قالوا: اللي فقير يحب وحده فقيره

قلت: واللي يحبّ يحب وحده خجول

قالوا: وذيك هيّ الأوله والأخيره؟

قلت: ما ادري.. او ادري بس ما ابغى اقول..!

حنين الأشواق 29 - 4 - 2022 02:23 AM
رد: ديوان ونبذه عن الشاعر فهد المساعد
 










يبه


يبه وانا بعد اثنعش عام حسيت

اني قدرت اقول شيٍ كتمته

ابطى قصيدي ماانكتب فيك وابطيت

اجر صوتي وارجع اجر صمته

ماودي اكتب بيت واندم على بيت

ماهوب شعر الشعر كاني زهمته

الشعر كانه ماانحنى ليّّ .. ماجيت

ان ماعزم مرثيتك ماعزمته

ان ماكتبته باازرق الدمع وابكيت

كل الجروح المبطيه مارحمته

يبه وانا من بعدك ابو التناهيت

مامر طعمٍ للحزن مانهمته

يبه يبه كلمه وانا كل مااوحيت

كلمة يبه صديت والوقت لمته

يبه يبه كلمه وانا كم تمنيت

يبه وانا لاضقت رحت وتهجيت

ركون بيتٍ ضم حلمٍ حلمته

يومك تعلمني الامن تحاكيت

درس الحياه اللي كبرت وفهمته

هناك كانت دلتك لاتقهويت

وهناك كان يساق طيبٍ حشمته

وهناك ايه اذكرني هناك خليت

طفلٍ ملا بالدمع دربٍ رسمته

هناك جاني علمك انك توفيت

وهناك خاويت الشقا واحتزمته

واليوم قلت اليوم يومي ومديت

كف القصيد وطاح شعر ونظمته

لكن بعد صمت اثنعش عام حسيت

اني عجزت اقول شيٍ كتمته!!

حنين الأشواق 29 - 4 - 2022 02:24 AM
رد: ديوان ونبذه عن الشاعر فهد المساعد
 










يبكون الحبايب فراقي


ياقلب طالت قسوتك وأنت ليّن

في قسوتك ياقلب ويش انت لاقي!؟

اللي تعدّى عمر ماهوب هيّن

والعالم الله كم من العمر باقي!

يمكن يطول .. ويمكن اليوم أعيّن

موتي .. ويبكون الحبايب فراقي

وش عاد أسوي وسط قبري وأزيّن؟!

لاجفت عروق .. وعيون .. وسواقي

لا عاد به فرصة عشان آتحيّن

ولا عاد به زفرة وأفك اختناقي

باكر وكل اللي سترته يبيّن

وانا على هالحال ميّس وهاقي

مدري متى يهديني الله وأديّن

وأكف عن بعض المشاوير ساقي

حنين الأشواق 3 - 5 - 2022 01:48 PM
رد: ديوان ونبذه عن الشاعر فهد المساعد
 










إحتياج


يوم هبّ الوقت وأعماني عجاجه

الفرج عيّا .. وأنا بالصبر راهي

ويوم مال وطال ميله وأعوجاجه

رحت أدوّر شي ٍ يشد إنتباهي

وشفت زولك مقبل ٍ مثل إنفراجه

كنّه اللي جايبٍ عزّي وجاهي

ياه ياضيقات صدري وإبتهاجه

تذكر آخر مرة ٍ شفتك ..متى هي!!

صاحبك من يومها زاد إحتياجه

وأمتطى ظهر المصايب والدواهي

سولف الليله على قلبي وناجه

من بقى لي غيرك أفخر به وأباهي

يابعد من كدّر غيابي مزاجه

ويابعد من مرّت حروفه شفاهي

رغم حيرة قلبك ورغم إنزعاجه

الزمن .. ماغيّر احساسه تجاهي

ورغم وحشة بعدك وقسوة سياجه

كل حاجه فيك ظلّت مثل ماهي

الخجل في وجهك أول م نتواجه

والبراءه في عيونك وأنت ساهي

وبسمتك لامن بغيت تقول حاجه

وغيرتك لاشفت كنّي عنك لاهي

قبل أشوفك .. والزمن عاقد حجاجه

أسأله: وش فيك؟! وألقى العذر واهي

ويوم شفتك قلت للوقت وعجاجه:

هيه ياللي في طعونك كنت راهي

أنت لو غيّرت فينا ألف حاجه

القلوب البيض تبقى مثل ماهي

حنين الأشواق 3 - 5 - 2022 01:48 PM
رد: ديوان ونبذه عن الشاعر فهد المساعد
 










التوبه


تطيح دمعه واسلم للفضا موقي

وارفع يدين الذنوب وتظلم أعماقي

اشوف قبري يمر بوحشته فوقي

وتصير كل الحياة أضيق من أخلاقي

يانفس طالت ليالي غيّنا فوقي

كم قلت يالله وقلتي تونا باقي

يالمزنه اللي تحن لغيثها نوقي

تعبت أخيلك وأقول نياقي نياقي

تعبت ياما تعبت وضاعت حقوقي

ياما ندمت وردمت الذنب ف أوراقي

ياما سكت وتركت البوح لعروقي

أخاف أسولف وأخيب هقوة الهاقي

أخاف ابوح ويخون الصمت منطوقي

وأقول شي يحث الناس لفراقي

يالله وأنت الملاذ إن مسني عوقي

وأنا ذنوبي جهد من راسي لساقي

يالله تغفر خطاي وترحم وتوقي

عظمي نهار الحساب وتقبل إعتاقي

حنين الأشواق 3 - 5 - 2022 01:49 PM
رد: ديوان ونبذه عن الشاعر فهد المساعد
 










الغربه


أيوالله أن شوفته تستاهل عنادي

اللي عشانه تركت الدار والتربه

مااقول لك شوفته نستّني بلادي

لكنّها يافهد نستّني الغربه

وش عاد لو قلت عني ضايع وغادي؟

وش أبركه من ضياعٍ دلّني دربه

تبغاني ارجع! وأنا ياصعب معوادي

مادام همّي نساني وأنقلع سربه

الهم هاللي تشوف انه عليّ بادي

ياليتك تشوف كيف يصير في قربه

الله يحرم ... عيوني لّذة رقادي

أنّي معه .. مااعرف حزني ولااشعربه

هرجك ف وادي وأنا ياخوك في وادي

الله يخلّيك ... حالي لاتعّذربه

راضي بحالي كذا ... واللي يجي عادي

لعيون منهو ركز في قلبي الحربه

بصوته شقاوته مزحه طبعه الهادي

يملا عليّ الفضا .. من شرقه لغربه

يكفيني أنه غدا هو شربي وزادي

أو تقدر تقول أنا اللي زاده وشربه

ياخي أذا الحب عيب! ف شفني آنادي:

سجل ..... أنا من عرف عيبه وجاهربه

وسجّل هنا كلمةٍ تستاهل عنادي

بقولها قبل أسافر وأترك التربه:

والله ماأقسى من الغربه عن بلادي

الا .. شعوري وانا في بلادي بالغربه


الساعة الآن 04:50 AM
صفحة 1 من 2 1 2
عرض 40 مشاركات من هذا الموضوع لكل صفحة

جميع الحقوق محفوظه للمنتدى
HêĽм √ 3.1 BY: ! ωαнαм ! © 2010


SEO by vBSEO