شبكة همس الشوق - وحام عجيب

انا كنت موظفه بأحد البنوك العالميه ... المهم طبعاً الكلام هذا قبل سنتين ممكن ، بنفس هذاك الوقت كنت الاحظ حرمه تجي تجلس ربع ساعه عشر دقايق وتطلع ! كان امره مريييب وعجييب يعني خير وش تبي تجي البنك بدون ماتسوي شي! تكررت جياته وصارت اسبوعياً تجي ! حفظتها من كثير ماتجي المهم وبعض المرات تجي باليوم ثلاث اربع مرات ! يعني تخيلوا معي تجي البنك ليييش ؟ وتجي ساكته ماتسوي شي ليييش ؟ ولو نقول انها تحاول تسرق او شي البنت مايبين عليها انها محتاجه ! شنطتها ماركه وجزمتها ماركه وعبايتها من اغلى المصممين تاخذها ! المهم كملت شهر وهي تجي وهي تروح ومره جت ودقيت على الامن حق البنك وقلت شوفوا بتطلع بعد شوي وحده لابسه جزمه كذا وشنطتها كذا ووصفتها لهم ، وقلت لهم انها تجي تجلس وتطلع واكثر من مره تسوي هالشي قالوا الامن خلاص ماعليك حنا بنمسكها 😂 المهم بعد ماطلعت لحقوها لما وصلت السياره وكنت انا اشوف مع الدريشه ويوم شفت السياره والله السياره فخمه وغاليه يعني شي غريب وش السالفه ؟ المهم لما وصلوا الامن لعند السياره قالوا لزوجها عطنا بطاقاتك والاشياء هذي المهم لما عطاهم وشافوا مافيه اسم مشتبه فيه والرجال معروف ولد ناس واغنياء ، جا وسأله واحد من الامن وقال له وش سالفة اللي معك ؟ كل مره تجي ليش ؟ المهم الرجال جلس يضحك ووجه احمر من الضحك والرجال مستغربين منه ليش وش السالفه ؟ لما هدا زوجها قال انها حامل و متوحمه على ريحة هالبنك 😂😂😂😂 رجال الامن تسدحوا من الضحك وانا يعني استغربت وش فيهم عاد لما رجعوا قالوا لي وعلمت كل القسم عن هالسالفه وصارت تجينا ونجلس نتقهوا ونسولف ونضحك وصارت علاقتنا معها حلوه والحين ابشركم هذي هي حامل بثاني الله يستر لو تتوحم بريحة طياره

مو احنا وحامنا على ريحة كفرات ولا ريحة تراب
ههههههههههههههههههههههههههه