كنك ورق غصني وأنا في وقفتي مثل الشجر=طحتي من غصوني ونا وياك لا يمكن أطيـح


الحب بأشواق العمر يامـا تهيـج وانفجـر=وإنتي ولا إنتي داريه لو أشتكي همي وأصيح



يا بنت ما عشتك غلا لجلك تموتينـي هجـر=إن مت بعيون الهوى ببقى بهالدنيا جريـح



كنت أحسبنك تصبري لو كان من شعرك أجر=ما تتركيني بالهوى مرضان وبهمي طريـح



دامك تبعتي عاذل ٍ منطوقه أسلـوب الغجـر=فتحملي كل الألم لو جـرك لحـدّ الضريـح



لونك عطيتي خامسه وألجمتي بفمـه حجـر=وخليتي أحلام الهوى داخل فؤادي تستريـح



ما كانك سمعتي غلط أو بعض أنواع الزجـر=من خل حطك بالصدر من غير مانك تستميح



كان بتعيشي بالهنا وتودعـي كـل الضجـر=وتقولي آمر وش تبي آنا على صوتك أسيح



وآسافرك وإنتي معي وأوصلّك حدود المجـر=وأكتبك بألواني شعر من حبر عينك ما يبيح



يا بنت أنا ليل الهوى وبصحبتي نور الفجـر=يا بنت أنا مثل الشجر أموت لكن ما أطيـح