ياغايبه غبتي ولاعاد شفناك=وينك تعالي زاد همي بهمين
شوفي بقايا هيكلي من سواياك= كلي نحفت ولابقى غير ضلعين
ضلع ٍ يضم اللي بقى من هداياك= وضلع ٍ يضم الدمع لاهلت العين
شوفي دخيل اللي من الحسن سواك= شوفي وحنّي وإرجعي لاتروحين
حنّي لقلبي دام نبضه بطرياك= دامي بنيت لحضرتك فيه قصرين
قصرٍ وريدي فيه ياكنْ شباك=والقصر الاخر فارْشته الشرايين
حنّي دخيل اللي مضى بالزمن ذاك=يومي معك في مامضى لي من سنين
يومي احس البرد واجيك وادفاك=مره دفا جمرك..ومره بالإيدين
يوم الحنايا رحبت فيك: حياك=جيتي لها ضيفه وصرتي تمونين
كم كنت افاخر وافتخر في مزاياك=كم كنت لك وافي على الروح والدين
ماكنت افكر يوم في يوم ابجفاك= عشتي بكل اوقاتي الزين والشين
كلي مع احساسي ودمي عشقناك=بعنا البشر كله وجيناك شارين
غلاي صادق لك من اقصاك لاادناك=غلاي غير وغير كل المحبين
عطيتك بجوفي من هناك..لهناك=دولة غرام وشعب ياصل ملايين
عطيتك الحكم الغرامي والاملاك= رشحت لك اعضاء وزاره وتكوين
واليوم ودك نفترق واتناساك=كذا نويتي..!! لأصدق الود تنسين
وش ذنب من حبك على الخلق واغلاك؟؟= ازعل عشانك ناس بالحيل غاليين
ازعلتهم لرضاك..لرضاك..لرضاك=ازعلتهم لأجلك علشان ترضين
مدري وش اللي صار مني ووش جاك=كذا بدون اسباب واعذار تقسين
ليت الغياب ايام يمكن عذرناك= المشكله غبتي يجي حول شهرين
والمشكله رقمك ادقه ولاالقاك=يدق لكن ماحصل لي تردين!!!!!